Жакында Кыргызстандын Саламаттык сактоо министрлигинде Германия, АКШ, Улуу Британия, Россия жана Жакынкы Чыгыш өлкөлөрүндө иштеп жаткан кыргыз медициналык адистеринин катышуусунда онлайн-конференция өткөрүлдү. Жолугушуунун алып баруучулары министрдин орун басарлары Бакытбек Кадыралиев жана Темирбек Эркинов болуп, бул тууралуу ведомствонун маалымат кызматынан билдиришти.
Иш-чаранын негизги максаты профессионалдык тажрыйба алмашуу, эл аралык медициналык практикалар, кадрларды даярдоо, саламаттык сактоо системасын цифрлаштыруу жана чет өлкөлөрдө иштеп жаткан мекендештердин өлкөдөгү медицина тармагын өнүктүрүүдөгү ролу боюнча талкуу жүргүзүү болду.
Талкуу учурунда катышуучулар дүйнөдөгү мыкты клиникаларда иштөө тажрыйбаларын бөлүшүп, Кыргызстандагы саламаттык сактоо системасын жакшыртуу үчүн идеяларды сунушташты. Алардын арасында бронхоскопия жана NGS-диагностика сыяктуу заманбап технологияларды, цифрдык чечимдерди киргизүү, ошондой эле онкологиялык, пульмонологиялык, трансплантологиялык жана анестезиологиялык жардамды жакшыртуу маселелери каралды. Ошондой эле гемодиализ, мобилдик клиникалар жана дарыгерлер үчүн лицензиялоону жеңилдетүү маселелери талкууланды.
Көпчүлүк сунуштар кадрдык камсыздоо маселелерине байланыштуу болду. Жолугушуунун катышуучулары кыргыз медиктерин окутууга жардам берүүгө, стажировкаларды уюштурууга, лекциялар жана эксперттик баяндамаларды өткөрүүгө, ошондой эле операцияларды жана мастер-класстарды өткөрүү үчүн чет элдик профессорлорду тартууга даяр экендиктерин билдиришти. Мындан тышкары, адистердин Кыргызстанга кайтып келүүсүнө жана профессионалдык долбоорлорго катышуусуна шарт түзүү маселелери талкууланды.
Фото www
