Жыйын министрдин орун басарлары Бакытбек Кадыралиев жана Темирбек Эркиновдун жетекчилиги астында өттү. Иш-чаранын негизги максаты тажрыйба алмашуу, эл аралык медициналык практикаларды киргизүү, кадрларды даярдоо, саламаттык сактоону санариптештирүү жана чет өлкөдөгү дарыгерлердин Кыргызстандагы саламаттык сактоо системасын жакшыртуудагы катышуусу болду.
Жыйындын катышуучулары белгилүү клиникалардагы иш тажрыйбалары менен бөлүшүп, өлкөдөгү саламаттык сактоону жакшыртуу боюнча идеяларын сунушташты. Өзгөчө, талкуунун борборунда бронхоскопия жана NGS-диагностика сыяктуу заманбап технологиялар, санарип чечимдерди өнүктүрүү, ошондой эле онкологиялык, пульмонологиялык, трансплантологиялык жана анестезиологиялык жардамды жакшыртуу маселелери болду. Мындан тышкары, гемодиализ, мобилдик клиникалар, лицензиялоону жеңилдетүү жана дарыгерлер үчүн окутуу маселелери көтөрүлдү.
Кадр маселелери негизги темалардын бири болду. Адистер кыргыз дарыгерлерин окутууга жардам берүүгө, стажировкаларды уюштурууга, лекциялар жана эксперттик баяндамаларды өткөрүүгө, ошондой эле операциялар жана мастер-класстар үчүн профессорлорду тартууга кызыктар экендиктерин билдиришти. Мындан тышкары, адистердин Кыргызстанга кайтып келип, профессионалдык долбоорлорго катышуу шарттары талкууланды.
Министрдин орун басарлары чет өлкөдөгү адистер менен өз ара аракеттешүү медицина үчүн маанилүү ресурс экенин белгилешти. Талкууланган чаралардын арасында кыргыз дарыгерлеринин жыш жайгашкан өлкөлөрдө очок жана онлайн-жыйындарды уюштуруу, Миррахимов окууларында чыгышуу мүмкүнчүлүгү, ошондой эле санарип жана кадр реформаларына катышуу маселелери бар.
Акырында Бакытбек Кадыралиев Саламаттык сактоо министри Каныбек Досмамбеттин атынан катышуучуларга ыраазычылык билдирди, мамлекеттин чет өлкөдөгү мекендештер менен профессионалдык байланыштарды сактоого болгон кызыгуусун баса белгиледи.
«Саламаттык сактоодогу кадр жетишсиздиги — биздин өлкө үчүн негизги чакырыктардын бири. Биз кызматташууга ачыкпыз жана бейтаптарыбыздын кызыкчылыгы үчүн тажрыйба, билим жана технологияларды тартуу боюнча практикалык чечимдерди издейбиз», - деди ал.
