Министрликтин маалымат кызматынын сүрөтү
Министрликтин маалымат кызматы тарабынан берилген маалыматка ылайык, текшерүү учурунда «Аалам Строй» компаниясы тарабынан курулуп жаткан Анкара көчөсүндөгү турак жай комплексинин курулуш процессинде бир нече мыйзам бузуулар аныкталды.
Маалыматка караганда, мыйзам бузуулар курулуш нормалары жана коопсуздук техникасына байланыштуу. Мындан тышкары, компания курулуштун белгилүү этаптарында көзөмөл жүргүзүү үчүн жеке лабораторияларды тарткандыгы жана курулуш блокторунун бир бөлүгү мыйзамсыз түрдө үлүш ээлерине өткөрүлүп берилгени белгилүү болду.
Текшерүүнүн натыйжасында «Аалам Строй» компаниясына 3 миллион сом өлчөмүндө жалпы айыппул салынды, ал эми объекттеги курулуш иштерин убактылуу токтотуу чечими кабыл алынды. Компаниянын лицензиясын токтотуу маселеси комиссия тарабынан каралат.
Нурдан Орунтаев курулуш иштеринин сапатын текшерүү үчүн Республикалык сертификаттоо борборун тартуу менен лабораториялык изилдөө жүргүзүүнү тапшырды. Алынган натыйжаларга негизделген кийинки чаралар кабыл алынат.
Ошондой эле министр жооптуу кызматкерлерге катуу чаралар колдонуларын белгиледи.
