Депутат самокаттарды колдонуу боюнча катуу эрежелерди киргизүүгө чакырды

Жакында өткөн парламент жыйынында депутат Бурун Аманова самокат колдонуучулары үчүн катуу эрежелерди киргизүү боюнча сунушун айтты. Бул талкуу «Кыргыз Республикасындагы жол кыймылынын коопсуздугун камсыз кылуу боюнча мыйзам актыларына өзгөртүүлөрдү киргизүү жөнүндө» мыйзам долбоорунун алкагында өттү.

Ал Европанын бир нече өлкөлөрүндө жана Мельбурн шаарында самокаттарды колдонууга тыюу салынганын, ал эми Кытайда чектөөлөр киргизилгенин белгиледи. «Биз тротуарда самокаттар жөө адамдарды сүзүп кетип жаткан учурларды байкап жатабыз. Ички иштер министрлигинин самокаттарды колдонууга катуу эрежелерди киргизүү ниети барбы?» — деп сурады Аманова.

Ички иштер министринин орун басары Октябрь Урмамбетов учурда самокаттардын жана мопеддердин кыймылын уюштуруу боюнча иштер жүргүзүлүп жатканын билдирди. «Мыйзамга өзгөртүүлөр киргизилгенден кийин, шаардык мэрия самокаттарды өз алдынча каттап, алардын колдонулушун көзөмөлдөй баштайт», — деп кошумчалады ал.