Конгресстин жүрүшүндө катышуучулар инновациялар, туруктуу өнүгүү жана тоо аймактарындагы табигый жана маданий мурастарды сактоо ортосунда оптималдуу тең салмакты издөөгө байланыштуу маанилүү аспектилерди талкуулашты. Бул иш-чара тоо өлкөлөрүнүн өкмөт өкүлдөрүн, эксперттерди жана индустриянын катышуучуларын туруктуу туризм үчүн стратегияларды иштеп чыгуу максатында чогултту.
Динара Кемелова ошондой эле Андорра өкмөтүнүн башчысы Ксавьер Эспот Самора менен жолугуп, Садыр Жапаровдун 2027-жылы өтүүчү «Бишкек+25» экинчи глобалдык тоо саммитине катышуу үчүн чакыруусун тапшырды, ошондой эле мамлекеттер ортосунда эл аралык аренада тоо маселелерин илгерилетүү боюнча кызматташтыкты тереңдетүүнү сунуштады.
Сапарынын алкагында президенттин атайын өкүлү БУУнун туризм боюнча башкы катчысы шейха Аль Нувайс менен жолугуп, тоо коомдоруна колдоо көрсөтүү жана туристтик инициативаларды илгерилетүү, анын ичинде маданий жана тарыхый объекттерди өнүктүрүү маселелерин талкуулашты.
Кыргызстандын тоо аймактарынын потенциалын ачууга, айрыкча Улуу Жибек жолунун тарыхый объекттерине, Талас согушунун маанисин баса белгилеген инфраструктураны түзүүгө жана башка маданий жайларга көңүл бурулду. Ошондой эле экологиялык жана агротуризм, геопарктарды түзүү, ошондой эле тоо коомдорун окутуу жана квалификациясын жогорулатуу темалары талкууланды.
Кемелова Андорра, Германия, Швейцария, Черногория, Италиянын өкүлдөрү, ошондой эле ЮНЕП жана ОБСЕ уюмдары менен жолугушууларды өткөрүп, Кыргызстандагы тоо инициативаларын колдоо, эки тараптуу жана көп тараптуу кызматташтыкты илгерилетүү, чет өлкөлөрдүн, эл аралык уюмдардын жана эксперттердин «Бишкек+25» саммитине кеңири катышуусун камсыз кылуу боюнча сүйлөшүүлөрдү жүргүздү.
