Студенттердин практикалык даярдыгын жакшыртуу пландалууда
Саламаттыкты сактоо министринин орун басары Темирбек Эркинов Пакистан Республикасынын Кыргызстандагы Чрезвычайный жана Ыйгарым укуктуу элчиси Алтамаш Вазир Хан менен жолугушуу өткөрдү, деп билдирет Саламаттыкты сактоо министрлигинин маалымат кызматы.
Жолугушуунун жүрүшүндө катышуучулар саламаттыкты сактоо жана медициналык билим берүү тармагындагы кызматташтыкка байланыштуу маанилүү маселелерди талкуулашты.
Пакистандык студенттердин кыргыз медициналык мекемелеринде билим алуусунда медициналык билим берүүнүн сапатын жакшыртууга өзгөчө көңүл бурулду.
Тараптар академиялык байланыштарды күчөтүүнүн, билим берүү стандарттарын жакшыртуунун жана студенттер үчүн практикалык окутууну кеңейтүүнүн зарылдыгын белгилешти.
Мындан тышкары, эки өлкөнүн медициналык университеттери жана саламаттыкты сактоо мекемелери ортосунда түз кызматташтыкты, мугалимдер жана дарыгерлер арасында тажрыйба алмашууну, ошондой эле биргелешкен илимий иш-чараларды уюштурууну талкуулашты.
