Бишкек шаардык бийлигинин пландарында «Тунгуч» аймагында жана «Алтын-Ордо» турак жай массивинин айланасында жаңы турак жай кварталдарын түзүү каралган. Бул тууралуу Бишкек шаардык архитектура башкармалыгынын жетекчиси Медербек Кыдырмаев түз эфирде билдирди.
Ал ошондой эле Свердлов районунда, «Бакай-Ата» турак жай массивинин чыгыш тарабында, жергиликтүү тургундардын өтүнүчү боюнча чоң парк жана социалдык объекттер куруу пландалып жатканын белгиледи.
Мындан тышкары, Первомай районунда, Түндүк айланма жол менен Фучик көчөсүнүн кесилишинде, эс алуу үчүн чоң аймактарды уюштуруу пландалууда.
Медербек Кыдырмаев бул демилгелер Бишкектин жаңыланган жалпы планынын бир бөлүгү экенин, шаардык инфраструктураны жакшыртууга жана коомдук мейкиндиктерди өнүктүрүүгө багытталганын баса белгиледи.
