Генералдык план — бул Бишкектин келечектеги 25 жылдык өнүгүүсүн аныктаган узак мөөнөттүү стратегиялык документ. Ал инфраструктура, калкты камсыздоо жана жашоо сапатын жакшыртуу сыяктуу негизги багыттарды камтыйт. Бул тууралуу ГУ «Бишкекглавархитектура»нын башчысы Медербек Кыдырмаев «Кабар» агенттигинде түз эфир учурунда билдирди.
Кыдырмаев мурдагы генералдык план 2006-жылы бекитилгенин жана анын иштөө мөөнөтү 2025-жылдын декабрында аякташы керектигин белгиледи. Учурда жаңы генплан боюнча негизги заказчы Бишкек шаары болуп саналат, ал эми мэрия жаңыланган документти иштеп чыгуу боюнча көрсөтмөлөрдү берди.
Учурда генералдык план боюнча иштер Санкт-Петербургдан келген илимий-изилдөө институту тарабынан жүргүзүлүүдө. 2024–2025-жылдар аралыгында административдик-территориялык реформалардын натыйжасында Бишкектин аянты үч эсе көбөйдү, бул жаңы айылдар жана турак жай массивдеринин борборго киргизилишин шарттады.
«Генплан боюнча иш жүргүзүү учурунда институт тарабынан көптөгөн аналитикалык изилдөөлөр жүргүзүлдү. Шаардык администрация жашоочулар үчүн атайын платформаларды жана суроо алууну баштады. Ошондой эле министрликке расмий суроолор жөнөтүлүп, алардын негизинде шаардагы негизги көйгөйлөр аныкталып, генпланды аныктаган негизги багыттар түзүлдү», – деп кошумчалады Кыдырмаев.
Ал жаңы генпландын негизги милдеттеринин арасында жолдордогу тыгындарды чечүү, экологиялык абалды жакшыртуу, социалдык объектилердин жетишсиздигин жоюу жана транспорттук инфраструктураны өнүктүрүү бар экенин баса белгиледи. Ошентип, генералдык план шаардагы актуалдуу көйгөйлөрдү чечүүгө шарт түзүүнү көздөйт.
