Жогорку Кенештин спикери Марлен Маматалиев Талас облусундагы иш сапарын улантып, Манас районунда социалдык жана маданий мекемелердин иши менен таанышып чыкты.
Парламенттин маалымат кызматына ылайык, анын биринчи токтогон жери Талас айылындагы №5 Үй-бүлөлүк дарыгерлер тобунун имараты болду. 1967-жылы ачылган бул медициналык мекеме азыркы учурда авариялык абалда жана заманбап стандарттарга жооп бербейт. Үй-бүлөлүк дарыгерлер тобунун кызматкерлери Маматалиевге жаңы имарат куруу боюнча жардам сурап кайрылышты.
Спикер саламаттык сактоону өнүктүрүү мамлекеттик саясаттын негизги багыты экенин белгиледи.
«Акыркы жылдары өлкөдө социалдык объектилерди жаңылоого көңүл бурулууда, жаңы мектептер жана ооруканалар курулууда. Граждандардын ден соолугуна кам көрүп, билим деңгээлин жогорулатуу менен биз күчтүү мамлекет кура алабыз», – деди ал, медициналык мекемени реконструкциялоо маселеси көзөмөлгө алынарын кошумчалады.
Мындан тышкары, спикер стоматологиялык кабинеттеги эски жабдууларды жаңылоону резервдик фондунун эсебинен убада кылды. ```
