Цзинан шаарында Кыргызстандын өкмөтүнүн төрагасынын орун басары Эдиль Байсалов менен Шаньдун провинциясынын КПК партиялык комитетинин катчысы Линь Унун ортосунда жолугушуу өттү, бул тууралуу өкмөттүн басма сөз кызматы маалымдады.
Переговорлор учурунда тараптар Кыргызстандын жана Кытайдын ортосундагы стратегиялык өнөктөштүктүн жогорку деңгээлин тастыкташты жана регион аралык кызматташтыктын келечегин талкуулашты. Кыргызстандын региондору менен Шаньдун провинциясы ортосундагы байланыштарды бекемдөөнүн маанисине өзгөчө көңүл бурулду.
Эдиль Байсалов практикалык кызматташтыкты активдештирүү, айрыкча, Кыргызстандын кичи жана орто бизнесин колдоо үчүн жаңы өндүрүштүк кубаттарды түзүү маселелерин көтөрдү.
«Акыркы беш жылда, президент Садыр Жапаровдун жетекчилиги астында социалдык-экономикалык өнүгүүнүн жогорку темпинин аркасында, Кыргызстан жаңы фазага кирип жатат. Мамлекеттин жетекчилиги заманбап өндүрүш технологияларын кеңири киргизүү, экспортко багытталган ишканаларды түзүү жана жаштар үчүн жаңы жумуш орундарын түзүү максатын койду. Бул контекстте өкмөт бир нече жаңы программаларды иштеп чыгууда жана Кытай менен активдүү кызматташууга ниеттенүүдө», — деп белгиледи Эдиль Байсалов.
Шаньдун провинциясынын КПК партиялык комитетинин катчысы Линь У бардык тараптар аралык кызматташтыкты кеңейтүүгө, инвестициялык байланыштарды өнүктүрүүгө жана өнөр жай тармагында жаңы демилгелерди киргизүүгө, ошондой эле гуманитардык алмашууларды активдештирүүгө жардам берүүгө даяр экенин билдирди.
Жолугушуунун натыйжасында регион аралык өз ара аракеттенүүнү бекемдөө боюнча кадамдар аныкталды жана тараптар жетишилген макулдашууларды ишке ашыруу боюнча биргелешкен ишти улантууга макулдашты.
Визит учурунда Кыргыз Республикасынын делегациясы Шаньдун провинциясынын алдыңкы машина куруу ишканаларынын иши менен таанышып чыкты.
