Переговорлордун жүрүшүндө Байсалов Кыргызстанда чакан жана орто бизнеске колдоо көрсөтүү максатында жаңы өндүрүш кубаттарын түзүү маселелерин көтөрдү.
«Учурда биздин жетекчилигибиздин алдында жаңы технологияларды өндүрүшкө массалык киргизүү, экспортко багытталган ишканаларды ачуу жана жаштар үчүн жумуш орундарын түзүү тапшырмасы турат», - деди ал.
Кабминдин маалыматына ылайык, Шаньдун провинциясынын КПК партиялык комитетинин катчысы кызматташтыкты кеңейтүүгө, инвестициялык мамилелерди өнүктүрүүгө, өнөр жай өндүрүшү боюнча жаңы демилгелерди ишке киргизүүгө жана гуманитардык алмашууларды активдештирүүгө даяр экенин билдирди.
Маалымат:
Шаньдун — Кытайдын чыгыш жээгинде жайгашкан провинция, Хуанхэ дарыясынын төмөнкү агымында орун алып, Бохай жана Сары деңиздери менен курчалган.
Болжолдорго ылайык, 2025-жылы Шаньдун провинциясынын жалпы ички өнүмү (ЖИӨ) $1,5 трлн түзөт, бул өткөн жылдын деңгээлинен 5,5% жогору. Регион Кытайда Гуандун жана Цзянсу провинцияларынан кийин ЖИӨ боюнча үчүнчү орунду ээлейт. Калкы 100 миллион адамдан ашат.
Ошол эле учурда, провинциянын борбору Цзинан шаарындагы ЖИӨ 2025-жылы $207 млрд жетип, 5,4% өсөт. Цзинан шаарында калкы болжол менен 10 миллион адамды түзөт.
