Агенттиктин маалыматына ылайык, жаңы борборлоштурулган тандоо тартиби киргизилүүдө: эми талапкерлер документтерин бир жолу тапшырат, мурдагыдай ар бир органга бөлөк-бөлөк эмес. Тандоонун жыйынтыгында жарандар бирдиктүү борборлоштурулган кадрдык резервге киргизилет.
«Бул жаңылык мамлекеттик жана муниципалдык органдарда жаш администратордук кызмат орундарга кайра-кайра конкурстарга катышуунун зарылдыгын жоюп, талапкерлерге мүмкүнчүлүк берет. Механизм кадрдык саясаттын ачыктыгын, жеткиликтүүлүгүн жана натыйжалуулугун жакшыртууга, ошондой эле мамлекеттик системада кызмат кылууга умтулган жарандар үчүн мүмкүнчүлүктөрдү кеңейтүүгө багытталган», — деп билдиришти мамлекеттик агенттиктен.
Кадрдык резервге документтерди кабыл алуу E-Kyzmat электрондук порталы аркылуу жүргүзүлөт, бул тандоо процессинде ачыктыкты жана бирдиктүүлүктү камсыз кылат.
Талапкерлер рейтингдик система боюнча баллдар негизинде бааланат, эң көп балл топтоочулар кызмат орундарын дайындоодо артыкчылыкка ээ болушат.
Кадрдык резервге кирүү үчүн үч этаптан өтүү керек: документтерди тапшыруу, нормативдик укуктук актылар боюнча компьютердик тестирлөө жана офлайн же онлайн форматында өткөрүлүүчү интервью.
Бардык этаптарды ийгиликтүү аяктаган талапкерлер үч жылдык мөөнөткө резервге киргизилет. Агенттик бул конкурстун жыйынтыгы менен 5 миңге чейин адамды резервге киргизүүнү пландаштырууда.
Документтерди кабыл алуу 2-марттан 6-мартка чейин жүргүзүлөт. Толук маалыматты www.gov.kg сайтындагы «Вакансии» бөлүмүнөн жана E-Kyzmat порталынан табууга болот.
