Дональд Трамп мурда Дания, Норвегия, Швеция, Франция, Германия, Улуу Британия, Нидерланд жана Финляндиядан АКШга жөнөтүлгөн бардык товарларга 10% бажы салыгы алынарын билдирген. Бул чечим европалык лидерлердин катуу реакциясын жаратты.
Еврокомиссиянын жана Европалык Союздун жетекчилери Урсула фон дер Ляйен жана Антониу Кошта Трамптын коркутууларын айыптап, трансатлантикалык мамилелердин бузулушу коркунучун белгилешти.
Франциянын президенти Эммануэль Макрон америкалык лидердин аракеттерин кабыл алынгыс деп мүнөздөсө, Швециянын премьер-министри Ульф Кристерссон өлкө шантажга баш ийбестигин белгиледи. Британ премьер-министри Кир Стармер бажы салыктарын киргизүү маселесин АКШ менен түздөн-түз талкуулоону пландап жатканын айтып, Трамп "абдан туура эмес" экенин кошумчалады.
Данияда жана Гренландияда АКШ президентинин инициативаларына каршы нааразылык акциялары өттү. Мындан тышкары, сегиз европалык өлкө аралга аскер жиберди.
Ошондой эле, Конгресске "Гренландияны аннексиялоо жана ага штат статусун берүү" боюнча мыйзам долбоору сунушталды. Мурда Трамп АКШ "каалайбы, каалабайбы" аралды көзөмөлгө алат деп билдирип, аны сатып алуу сунушун биринчи президенттик мөөнөтүндө берген. 2025-жылдын мартында ал Гренландияны аннексиялоо мүмкүнчүлүгүнө ишенерин айтып, Копенгагенге соода бажы салыктарын киргизүү менен коркутту.
Гренландия Даниянын автономдуу аймагы болуп саналат. 1951-жылы Вашингтон жана Копенгаген аралды коргоо боюнча келишимге кол коюшкан, анын алкагында АКШ анын мүмкүн болгон агрессиядан коргонушун камсыздоого милдеттенмелерин алган.
