29-январда Билим берүү министрлигинде министр Догдуркуль Кендирбаеванын жетекчилиги астында жыйын өттү. Иш-чарага министрдин орун басарлары, министрликтин карамагындагы структуралардын жетекчилери жана донордук уюмдардын өкүлдөрү катышты.
Жыйында 12 жылдык мектеп билим берүүнүн биринчи жарым жылдыгынын натыйжалары боюнча аралык мониторинг жана аналитикалык баалоо маселеси көтөрүлдү.
Министрликтин билдирүүсүндө 12 жылдык билим берүүнүн баштапкы этаптарында жетишилген натыйжаларды аныктоо үчүн анкета суроолору жана байкоолорго негизделген комплекстүү анализ өткөрүү пландары тууралуу айтылган.
Министр аралык жана жыйынтык анализдери реформанын биринчи жыйынтыктары жөнүндө объективдүү түшүнүк түзүүгө, мурда кабыл алынган чечимдердин натыйжалуулугун баалоого жана көйгөйлүү аймактарды, жетишкендиктерди, ошондой эле 12 жылдык билим берүүнүн келечектеги этаптарын түзөтүү үчүн багыттарды аныктоого жардам берерин белгиледи.
Мугалимдердин квалификациясын жогорулатууга, окуу программаларынын жана предметтик стандарттардын практикалык колдонулушун баалоого, ошондой эле электрондук билим берүү ресурстарынын жана цифрлык платформалардын натыйжалуулугун анализдөөгө чоң көңүл бурулат. Бул санга Кыргыз билим берүү академиясынын, Республика боюнча мугалимдердин квалификациясын жогорулатуу жана кайра даярдоо институтунун, ошондой эле «Окуу китеби» порталдары кирет.
Мониторинг учурунда мугалимдердин автоматташтырылган маалымат системаларын, мисалы, «Мугалим», «Кундолук» жана башка цифрдык чечимдерди канчалык деңгээлде өздөштүргөндүгү да бааланат. Анализ бул системаларга киргизилген жана башкаруучулук чечимдерди кабыл алуу үчүн колдонулган маалыматтардын тактыгы, актуалдуулугу жана толуктугуна көңүл бурат.
Министрликтен белгилегендей, аралык мониторингти Билим берүү министрлигинин Билим сапатын өнүктүрүү департаменти жүргүзөт.
