Ведомствонун маалымат кызматынын маалыматына ылайык, жыйынга маданият министринин орун басары Асель Раимкулова, Кыргызстандагы БУУ системасынын туруктуу координатору Антье Граве, өлкөдөгү ПРООНдун туруктуу өкүлү Александра Соловьева, Кыргызстандагы ФАО өкүлү Олег Гучгельдыев, региондогу «БУУ-аялдар» өкүлү Сайед Садик жана БУУнун Дүйнөлүк азык-түлүк программасынын өлкөлүк директору Кожиро Накай катышты.
Иш-чаранын жүрүшүндө катышуучулар 2025-жылга чейин өлкөнүн климаттык өзгөрүүлөргө туруктуулугун жогорулатууга, табигый ресурстарды башкарууну жакшыртууга жана табигый кырсыктарга алдын ала эскертүү жана жооп берүү системаларын өнүктүрүүгө багытталган биргелешкен аракеттердин жыйынтыктарын талкуулашты. Ошондой эле 2026–2027-жылдарга карата негизги стратегиялык приоритеттер аныкталды.
2025-жылы Кыргызстандын климаттык өзгөрүүлөрдүн кесепеттерине адаптациялык потенциалын жогорулатуу, табигый кырсыктарды башкаруу механизмдерин иштеп чыгуу жана мамлекеттик органдар, эл аралык уюмдар жана жеке сектордун катышуусунда аралык өнөктөштүктү кеңейтүү боюнча комплексдүү иштер жүргүзүлдү.
Катышуучулар ошондой эле климаттык жана экологиялык приоритеттерди Кыргызстанды 2030-жылга чейин өнүктүрүүнүн Улуттук программасы менен макулдашуу зарылдыгына, ошондой эле калктын жашоо деңгээлин жакшыртууга жана өлкөнүн региондорунун туруктуу өнүгүшүнө көмөктөшүүчү конкреттүү өлчөнүүчү жыйынтыктарга жетишүүгө көңүл бурушту.
