Бюджетке 1 миллиард 176 миллион доллардан ашык киреше түштү.
Президент Садыр Жапаровдун республикалык жыйында билдиргенине ылайык, 2021-жылдан 2025-жылга чейин «Кумтордун» иши боюнча жалпы киреше 5 миллиард 115 миллион долларды түзөт.
Президент «Кумтордун» мамлекеттик менчикке кайтып келиши Кыргызстандын экономикалык көз карандысыздыгын бекемдөөгө маанилүү кадам экенин белгиледи.
Аталган мезгилде өлкөнүн бюджетине салык жана милдеттүү төлөмдөрдөн 1 миллиард 176 миллион доллардан ашык киреше түшкөн. Мындан тышкары, акыркы төрт жылда республика 441 миллион доллар өлчөмүндө дивиденд алган, бул 38 миллиард сомдон ашыкка барабар.
Садыр Жапаров 1994-жылдан 2021-жылга чейин Кыргызстан «Кумтордон» жалпысынан 100 миллион доллардай дивиденд алганын да белгиледи.
«Мурда 410 тонна алтын чыгарылган, анын болгону 1 тоннасы өлкөгө пайда алып келди. Эми болсо «Кумтор» стабилдүү түрдө бюджетти толтуруп, социалдык программаларды жана инфраструктуралык долбоорлорду каржылоого катышууда», - деп кошумчалады ал.
