Ал бул долбоор өлкө үчүн да, жеке өзү үчүн да олуттуу проблема экенин баса белгиледи.
«Узак жылдар бою бул стратегиялык мааниге ээ объекттин айланасында талаш-тартыштар токтогон жок, айыптоолор жана жалаа угулуп, саясий оюндар жүрдү. Эл дайыма бир жөнөкөй суроону берип жатты: Кыргызстандагы алтын өлкөнүн кызыкчылыгында колдонулуп жатабы? Менин саясий жолумдун башынан бери «Кумторду» мамлекеттик менчикке кайтаруунун зарылдыгын талап кылып келдим», — деди президент.
Президент 2021-жылы «Кумтор» толугу менен Кыргыз Республикасынын менчигине өткөнүн, бул мамлекеттин экономикалык көз карандысыздыгын бекемдөөгө маанилүү кадам катары мүнөздөгөнүн эске салды.
2021-жылдан 2025-жылга чейин «Кумтордун» ишмердүүлүгүнөн жалпы киреше $5 миллиард 115 миллионду түзөт, бул 440 миллиард сомдон ашат. Мамлекеттик бюджетке салык түшүүлөрү жана милдеттүү төлөмдөр түрүндө $1 миллиард 176 миллион же 100 миллиард сомдон ашык каражат киргизилди. Мындан тышкары, акыркы төрт жылда мамлекет $441 миллион дивиденд алды, бул 38 миллиард сомдон ашыкка барабар.
«Салыштыруу үчүн: 1994-жылдан 2021-жылга чейин Кыргызстан «Кумтордон» бардыгы болуп $100 миллионго жакын дивиденд алды. Мурда 410 тонна алтын чыгарылды, анын ичинен болгону 1 тонна өлкөгө пайда алып келди. Азыркы учурда «Кумтор» бюджет үчүн ишенимдүү киреше булагына айланды жана социалдык программаларды жана инфраструктуралык долбоорлорду каржылоого жардам берет», — деп кошумчалады президент.
