Акунбеков ведомствонун келечеги тууралуу сүйлөп жатып, мурунку министри Бакытым Торобаев тарабынан башталган беш негизги багыттын ишке ашырылышы улантыларын айтты. Министр кызматкерлердин кесипкөйлүгүнө ыраазычылык билдирип, кадрдык туруктуулуктун зарылдыгына көңүл бурду, учурдагы команданын натыйжалуулугуна ишендирди.
Жыйында министрдин орун басарлары тармактагы учурдагы абал тууралуу отчетторду сунушташты. Айрыкча, биринчи орун басар Жаныбек Керималиев ведомствонун ишмердүүлүгү жөнүндө айтып берсе, орун басар Мирбек Дуйшеев кредит берүү программаларынын жүрүшү тууралуу маалымат берди. Учурда агроөнөр жай комплексинде 13 млрд 180 млн сомдук мамлекеттик финансылык колдоо боюнча 9 долбоор ишке ашырылууда.
Министр ошондой эле жазгы талаа иштерине даярдыкка көңүл бурду, профилдик жетекчилерге фермерлер үчүн уруктарды, күйүүчү-майлоочу материалдарды жана техника жеткирүүнү катуу көзөмөлдөөнү тапшырды. Суу секторундагы реформаны аяктоо ведомствонун стратегиялык приоритеттеринин бири катары белгиленди.
Жыйындын аягында Акунбеков кесиптештерин адилеттүү жана ачык иштөөгө чакырып, кыска убакыттын ичинде конкреттүү натыйжаларга жетүүгө багыт алууну сунуштады.
