Биринчи орун басар мэр Мирланбек Байгончоков өткөн жылдагы Бишкектин социалдык-экономикалык өнүгүүсүнүн жыйынтыктары менен бөлүштү.
2025-жылы Бишкектин социалдык-экономикалык өнүгүүсү мамлекеттик жана муниципалдык программалардын алкагында АТРди эске алуу менен жүргүзүлдү. Мэриянын негизги иш багыттары туруктуу экономикалык өсүүнү камсыз кылуу, инвестицияларды тартуу жана инфраструктураны өнүктүрүү, ошондой эле шаар аймагынын кеңейишинде муниципалдык башкаруунун натыйжалуулугун жогорулатуу болду.
Эгер негизги макроэкономикалык көрсөткүчтөргө токтолсок, Улуттук статистика комитетинин маалыматы боюнча, акыркы 5 жылда өсүш 300% түздү. 2024-жылдын жыйынтыгы боюнча Бишкектин валовой регионалдык продукты 744,0 млрд сомго жетип, 115,8% өсүү темпин көрсөттү.
Өнөр жай өндүрүшүнүн көлөмү да маанилүү өсүштү көрсөтүп, 5 жылда 3,6 эсе көбөйдү. 2025-жылы Бишкектин өнөр жай ишканалары 130,4 млрд сомдук продукция өндүрүштү, физикалык көлөмдүн индекси 123,1% түздү. Өнөр жайды өнүктүрүүгө жардам берген негизги долбоор «100 өнөр жай ишканасы - 2025» болуп, анын алкагында 6 жаңы ишкана ачылды.
Базар кызматтары сектору да оң динамиканы көрсөтүп, акыркы 5 жылда 5,4 эсе көбөйдү. 2025-жылы Бишкектеги базар кызматтарынын көлөмү 1 трлн 879 млрд 238,3 млн сомду түзүп, өткөн жылга салыштырганда 114,5% өсүү темпин көрсөттү.
Инфляция деңгээлин чагылдырган керектөө бааларынын индекси 2025-жылы 2024-жылга салыштырганда 107,8% түздү. Базардагы активдүүлүктүн жогорулашы шартында мэрия баа туруктуулугуна жана жарандардын кызыкчылыктарын коргоого өзгөчө көңүл бурду. Бул контекстте эт азыктарынын бааларын контролдоо боюнча 461 рейддик иш-чара өткөрүлдү, ага антимонопольдук кызмат жана башка органдар катышты.
2025-жылы курулуш тармагы да маанилүү өсүштү көрсөтүп, бул инвестициялык активдүүлүктүн маанилүү көрсөткүчү болуп саналат. Курулуштун валовой продукциясынын көлөмү 5 жылда 2,3 эсе көбөйүп, 143,5 млрд сомду түздү, бул өткөн жылга салыштырганда 19,7% жогору.
Бишкектеги орточо айлык эмгек акы акыркы 5 жылда 2,4 эсе өстү жана 2025-жылдын январь айынан ноябрь айына чейин 54 672,9 сомду түзүп, 2024-жылдын ушул мезгилине салыштырганда 24,4% жогорулады.
