Кыргыз Республикасында халал-индустрия тармагындагы мыйзамдардын талаптарын бузгандыгы үчүн административдик жаза киргизүү пландалууда. Жакында Жогорку Кеңештин финансы, бюджет, ишкердик жана атаандаштыкты өнүктүрүү боюнча комитетинин жыйынында тиешелүү өзгөртүүлөр талкууланды.
Экономика жана соода министринин орун басары Султан Ахматов учурдагы «Кыргыз Республикасындагы халал-индустрия жөнүндө» мыйзамда мындай бузуулардын жоопкерчилиги каралганын белгиледи. Бирок, бул нормалар азырынча Жаза кодексинде чагылдырылган эмес.
Ошондуктан, кодекске «Кыргыз Республикасындагы халал-индустрия тармагындагы мыйзамдардын талаптарын бузуу» деген жаңы статьяны киргизүү сунушталууда.
Сунушталган мыйзам долбооруна ылайык, зарыл документтерсиз халал-продукция жана кызматтарды өндүрүү жана сатуу үчүн айып пулдар төмөнкүдөй болот:
— 7 500 сом жеке жактар үчүн;
— 23 000 сом юридикалык жактар үчүн.
Ошондой эле, халал-продукция жана кызматтардын ылайыктуулугун тастыктоо процедурасын бузган юридикалык жактар үчүн 13 000 сом айып пул киргизүү сунушталууда.
Талкуунун жыйынтыгы боюнча, Жогорку Кеңештин профильдик комитети аталган мыйзам долбоорун биринчи окууда жактырды.
Сүрөт www
