Министрлер кабинетинин орун басары Эдиль Байсалов Кыргыз Республикасынын физикалык тарбия жана спорт мамлекеттик агенттигинин коллегиясынын жыйынына катышты. Жыйында 2025-жылдагы жетишкендиктер талкууланды. Бул иш-чарага ошондой эле облустук физикалык тарбия жана спорт башкармалыктарынын өкүлдөрү, коллегиянын мүчөлөрү жана Улуттук олимпиада комитетинин өкүлдөрү катышты, деп билдирет өкмөттүн маалымат кызматы.
Эдиль Байсалов өз сөзүндө атайын агенттиктин түзүлүшү ресурстарды топтоого жана спортто башкаруу натыйжалуулугун жогорулатууга көмөктөшкөнүн белгиледи. Ал мамлекеттин бул тармактагы туруктуу колдоосун белгилеп: «Каржылоонун көлөмү кыйла көбөйүүдө. Эгер 2020-жылы 800 миллион сом бөлүнсө, 2025-жылы бул сумма дээрлик 2,6 миллиард сомду түзөт. Бул мамлекеттин спорт тармагына болгон ишенимин жана спортчуларга болгон жоопкерчилигибизди тастыктайт», - деди.
Байсалов Кыргыз Республикасынын 2030-жылга чейин өнүктүрүү боюнча Улуттук программасын ишке ашырууга көңүл бурду. Ал негизги милдет - физикалык тарбия жана спорт менен машыгууга жеткиликтүүлүктү кеңейтүү, инфраструктураны модернизациялоо, олимпиадалык резервди даярдоо жана массалык спортту өнүктүрүү, анын ичинде билим берүү мекемелеринде спорт секцияларын ачуу экенин баса белгиледи. Аялдар спортуна колдоо көрсөтүү да көңүл борборунда болот.
Мындан тышкары, орун басар төрага Лос-Анжелесте өтө турган XXXIV жайкы Олимпиада оюндарына жана XVIII жайкы Паралимпиада оюндарына даярдыкты маанилүү деп белгиледи: «Олимпиада - спорттун эң жогорку максаты. Учурдагы кемчиликтерди талдап, спортчуларыбызды сапаттуу даярдоо керек».
Жыйында ошондой эле «Кыргыз спорттук-ден соолук медицина борборун» мамлекеттик ишканасын ишке киргизүүнү тездетүү, массалык мелдештерде коопсуздук чараларын жакшыртуу жана спорт тармагындагы кызматтарды санариптештирүүнү активдештирүү боюнча тапшырмалар берилди. Кыргыз мамлекеттик физикалык тарбия жана спорт академиясына өз ишин кайра карап чыгуу жана жаңы спорт түрлөрү боюнча адистерди даярдоону күчөтүү тапшырылды.
2026-жылы Кыргызстан бир нече ири эл аралык турнирдi өткөрүүнү пландаштырууда, анын ичинде күрөш боюнча Азия чемпионаты жана Ысык-Көлдө парус спорту боюнча Борбордук Азия чемпионаты, ошондой эле Көчмөндөрдүн Дүйнөлүк оюндары. Жыйынды жыйынтыктоодо профилдик структураларга 2030-жылга чейин физикалык тарбия жана спортту өнүктүрүү боюнча комплексдүү программаны иштеп чыгууну тездетүү тапшырмасы берилди.
