Кыргызстан командасынын курамында тоо лыжасы жана лыжа жарыштары боюнча адистешкен эки спортчу катышты.
Олимпиаданын ачылышында, 7-февралда, лыжачы Артур Сапарбеков Кыргызстандын желегин көтөрүп чыкты.
Сапарбеков 10-февралда стартка чыккан биринчи кыргызстандык болуп, классикалык стильде спринт жарышына катышты. Бул дисциплинада 95 катышуучу катталган болсо, стартка 94 спортчу чыкты. Артур 94-орунду ээлеп, Норвегиянын Олимпиада чемпиону Йоханнес Клебого 1 мүнөт 29,48 секундду жоготту.
13-февралда ал 10 км эркин стильде жарышка катышты, анда 113 катышуучу катталган.
Жарыштын биринчи жарымында Артур биринчи жүздүктө болду, бирок сегизинчи километрде кулап кетти, бул анын убактысына терс таасир этти. Акырында, ал 27 мүнөт 46,9 секунд менен финишке чыгып, 102-орунду ээледи. Бул дистанцияда Олимпиада чемпиону катары кайрадан Клебо жеңишке жетти.
14-февралда Олимпиадада дебют кылган тоо лыжачы Тимур Шакиров гиганттык слаломго катышты, анда 81 спортчу катталган.
Ал биринчи аракетте 67-орунду, экинчи аракетте 62-орунду ээлеп, жалпы 69 финишке чыккан спортчу арасында 62-орунду алды. Бул дисциплинада Олимпиада чемпиону бразилиялык Лукас Пиньейро Бротен болду.
16-февралда өткөн слалом мелдеши жаман аба ырайы — кар жаап, начар көрүнүш менен коштолду. Биринчи аракетте катышуучулардын жарымынан көбү финишке чыга алышпады, алардын арасында Тимур Шакиров да болду.
Ошентип, Кыргызстандык спортчулар кышкы Олимпиада оюндарына катышуусун аякташты.
