Кыргыз Республикасынын Транспорт жана байланыш министрлигинде Суусамыр–Талас–Тараз жолунун IV фазасын реконструкциялоо боюнча иштер улантылып жатканы тууралуу маалымдашты. Учурда жолдун асфальттык төшөмөсүн тегиздөө жана кеңейтүү, электр өткөргүчтөрүнүн бетон опорлорун демонтаждоо, суу өткөрүү түтүктөрүн көчүрүү жана көпүрөлөрдү куруу боюнча иш-чаралар жүргүзүлүүдө.
Проектте 229дан ашык кызматкер жана 147ден ашык атайын техника тартылган. Ошондой эле, долбоордун алкагында эки асфальт-бетон заводдору, бир бетон завод жана эки майдалоо станциясы иштеп жатат.
Реконструкцияланып жаткан участоктун узундугу 93 км, Талас шаарынан башталып, «Кичи-Капка» өткөрмө пунктунда аяктайт. Курулуш иштеринин аякташы 2025-2028-жылдар аралыгында болот деп күтүлүүдө, ал эми долбоор үчүн кепилдик мөөнөт 5 жылга белгиленген.
«Долбоордун алкагында 6 көпүрөнү жаңылоо, бир жер астындагы өтмөктү куруу, ошондой эле айылдарда тротуарлар жана жарык берүү системасын түзүү каралган. Жолдун техникалык категориясы III категориядан II категорияга көтөрүлөт», - деп билдирилди.
