«Бала ырысы» пособосунун суммасы 1200 сомду түзөт. Бул пособо Кыргызстандын жарандарына, ошондой эле кайрылман статусуна ээ адамдардын балдарына берилет. Бул тууралуу Эдел Жомартова, Эмгек, социалдык камсыздоо жана миграция министрлигинин мамлекеттик пособолор бөлүмүнүн башкы адиси, «Кабар» агенттигинин «Элден Собол» берүүсүндө билдирди.
Адистин билдиргенине караганда, бул пособо үй-бүлөнүн материалдык абалынан көз каранды эмес берилет. «Жогорку тоолуу аймактардын тургундары үчүн төлөмдөр райондук коэффициентти эске алуу менен жүргүзүлөт», - деп тактады ал.
Пособону алуу үчүн шарттардын бири - бала энеси менен жашашы керек. Ата-энелер чет өлкөдө болбошу керек.
Пособону алуу үчүн төмөнкү документтер талап кылынат:
- эненин паспорту жана баланын туулгандыгы тууралуу күбөлүк;
- ПИН номеринин болушу шарт.
Эскерте кетсек, март айынын башында Кыргызстандын президенти Садыр Жапаров үч жашка чейинки бардык балдар үчүн жаңы ай сайын берилүүчү мамлекеттик пособо - «Бала ырысы» тууралуу жарлыкка кол койгон.
