Мыйзам долбоорлору үч окууда кабыл алынды
Жогорку Кеңештин жыйынында депутаттар Египет, Оман, Словения жана Бенилюкс менен дипломатиялык жана кызматтык паспорттордун ээлери үчүн визаларды өз ара жокко чыгаруу боюнча макулдашууларды ратификациялоого байланыштуу мыйзам долбоорлорун талкуулашты.
Мыйзам долбоорлорун тышкы иштер министринин орун басары Алмаз Имангазиев сунуштады.
Ал бул макулдашууларга ылайык, Кыргызстан менен аталган өлкөлөрдүн дипломатиялык, атайын жана кызматтык паспортторунун ээлери 90 күндөн ашпаган мөөнөттө, жарым жылдын ичинде кирүү, чыгуу жана транзит үчүн визадан бошотулары тууралуу маалымдады.
Талкуу учурунда депутаттар Тышкы иштер министрлигинин визалык режимди жеңилдетүү боюнча ишин улантуунун маанилүүлүгүнө көңүл бурушту, бул процесске дипломатиялык жана кызматтык паспорттордун ээлеринен тышкары, жалпы жарандык паспорттордун ээлерин да кошууну сунушташты.
Талкуудан кийин депутаттар аталган мыйзам долбоорлорун кабыл алышты.
