Докладчы Бактыяр Калпаев санариптештирүү шарттарында, көпчүлүк процесстер онлайн форматта жүргүзүлүп жатканда, жарандардын кайрылууларын иштеп чыгууну тездетүүнүн зарылдыгы тууралуу маселе актуалдуу болуп жатканын белгиледи.
Депутаттардын аталган мыйзам долбоору боюнча өкмөттүн позициясы тууралуу суроосуна жооп берип, ал өкмөттүн терс корутунду бергенин маалымдады.
Башкы прокурордун орун басары Залкарбек Акназаров да Башкы прокуратура каршы экенин тастыктады. «Ар бир мамлекеттик орган өзгөчөлүктөргө ээ. Биз 10 күн сапаттуу жооп даярдоо үчүн жетишсиз деп эсептейбиз», — деп кошумчалады ал.
Калпаев жаңычылдыктарды киргизүү ар дайым кыйынчылыктар менен коштолорун баса белгиледи. «Биздин максат — бюрократиялык тоскоолдуктарды азайтуу жана жарандардын жашоосун жеңилдетүү. Биз мамлекеттик органдын кызматкерлери 14 күн жооп берүү үчүн убакытка ээ болгондо, көп учурда кайрылууларды акыркы мөөнөткө чейин кечиктирип, иштердин топтолушуна алып келерин өз тажрыйбабыздан билебиз», — деп түшүндүрдү ал.
Депутат Болот Ибрагимов кесиптештерин мыйзам долбоорун колдоого чакырып, мамлекеттик органдар формалдуу жооп берүүнү уланта берсе, мөөнөттөрдүн мааниси болбой каларын белгиледи. «Мен 15 жылдан бери ар кандай мамлекеттик органдарга кайрылып келем жана болгону 2-3 пайыз учурларда канааттандырарлык жооп алдым», — деп баса белгиледи ал.
Ибрагимов ошондой эле замгенпрокурор Залкарбек Акназаров буга чейин балдардын жана өлкөнүн кызыкчылыктарын бузган кылмыштарга жооп бербей келгенине көңүл бурду. «Ал бир жыл бою биздин суроолорго жооп бербеди, эми биз туура болгонубузду көрүп жатабыз. Мыйзам долбоорун колдоону суранам», — деп кошумчалады депутат.
Натыйжада, эл өкүлдөрү мыйзам долбоорун биринчи окууда кабыл алышты.
