Суу секторун өнүктүрүүгө 567 миллион доллар инвестиция жумшалды
Кыргыз Республикасынын Жогорку Кенешинин маалымат кызматы билдиргендей, Агрардык саясат, суу ресурстары, экология жана айлана-чөйрөнү коргоо боюнча комитеттин жыйынында Кыргызстандагы ичүүчү жана саркынды сууларды тазалоо курулмаларынын абалы тууралуу маалымат берилди.
Суу ресурстары, айыл чарба жана кайра иштетүү өнөр жайы боюнча орун басар министр Жаныбек Керималиев 2021-жылдан бери суу секторуна көбүрөөк көңүл бурулуп жатканын белгиледи.
Жалпы тартылган инвестициялардын көлөмү 567 миллион долларды түздү, анын 55 миллиону республикалык бюджеттен бөлүнгөн.
«Бул каражаттар 2021-жылдан 2025-жылга чейин 25 шаар жана 601 айылдагы суу камсыздоо системаларын жакшыртууга мүмкүндүк берди», — деди ал.
Комитеттин мүчөлөрү калкты сапаттуу ичүүчү суу менен камсыз кылууну тездетүүнүн маанилүүлүгүн белгилешти.
Депутат Алишер Козуев Кара-Суудагы тазалоо курулмаларын тез арада пайдаланууга берүүнүн зарылдыгына көңүл бурду, пландалган объектти ишке киргизүү мөөнөтү 2026-жылдын төртүнчү кварталы экенин билдирди.
Депутат Нилуфар Алимжанова региондордо суунун сапатын контролдоо үчүн лабораторияларды түзүүнү сунуштады.
Комитеттин төрагасы Бакыт Тентишев суунун сапаты санитардык нормаларга жооп бериши керектигин, ошондой эле суу тазалоо жана дезинфекциялоо системаларын киргизүү зарылдыгын белгиледи.
сүрөт www
