Жолугушуунун алкагында катышуучулар «жашыл мектептер» регионалдык платформасынын концепциясын талкуулашты, аны «Балдар, жаштар жана климат» аталышындагы тегерек столдо жогорку деңгээлде бекитүү пландалууда. Ошондой эле, региондогу өсүп жаткан чегара аралык экологиялык көйгөйлөрдү эске алуу менен климатка туруктуу билим берүү системаларын түзүү маселелери да талкууланды.
Жолугушуунун жүрүшүндө Джусупбекова Кыргызстанда билим берүүнү экологиялаштыруу боюнча жүргүзүлүп жаткан реформалар жана учурдагы абал тууралуу маалымат бөлүштү. Ал бул багыттагы иштер ресурсту натыйжалуу пайдалануу, мектеп инфраструктурасынын коопсуздугун жана климатка туруктуулугун жакшыртуу, ошондой эле экологиялык темаларды окуу программаларына интеграциялоону камтыйт деп баса белгиледи.
Анын айтымында, Кыргызстанда учурда 120дөн ашык климатка туруктуу мектеп иштеп жатат, энергияны натыйжалуу пайдалануу боюнча демилгелер ишке ашырылууда, курулуш нормалары жаңыртылып, «жашыл мектептер» үчүн стандарттар иштелип чыгууда.
