Бул жылы Ысык-Көл облусунда электр тармактарын модернизациялоо иштери улантылат. Кыргыз Республикасынын Энергетика министрлиги 2000ден ашык эски жыгач опорлорду заманбап темир-бетон опорлору менен алмаштыруу пландары тууралуу маалымдады.
Министрликтин маалыматына ылайык, алмаштырууга жатуучу жыгач опорлор 1960-70-жылдары орнотулган жана узак убакыт бою пайдалануу мөөнөтүн ашып, авариялык абалда турат.
Иштер 2026-жылы төмөнкү бөлүштүрүү электр тармактарында (БЭТ) жүргүзүлөт:
- Ак-Суй БЭТ – 258 опор
- Каракол БЭТ – 260 опор
- Жети-Огуз БЭТ – 263 опор
- Тон БЭТ – 543 опор
- Чолпон-Ата БЭТ – 314 опор
- Түп БЭТ – 229 опор
- Балыкчы БЭТ – 282 опор.
2025-жылы 1500дөн ашык темир-бетон опорлор ийгиликтүү орнотулганы, аймактагы бир катар калктуу пункттардын инфраструктурасын жакшыртууга мүмкүнчүлүк бергенин белгилөө маанилүү.
Мындан тышкары, 2026-жылы орнотулчу жаңы темир-бетон опорлор өзүнүн темир-бетон буюмдарын чыгарган цехи бар ишканада өндүрүлөт.
