2025-жылы өндүрүштө жабыркагандарга төлөнгөн компенсациялардын суммасы 111,057 миллион сомду түздү.
Эмгек министрлигинин маалыматына ылайык, 28 инспектор 1173 текшерүү жүргүзүп, натыйжасында эмгек мыйзамдарын бузган 1885 факт аныкталган. Катталган окуялардын арасында 161 адам жабыркаган, алардын 94ү оор жаракат алган, ал эми 63 адам каза болгон.
Бузуучуларга салынган айыппулдардын суммасы 8,838 миллион сомду түзүп, анын 6,936 миллион сому төлөнгөн. Жыл ичинде кызматкерлерге жалпы эсептелген эмгек акы 14,726 миллион сомго жеткен.
2025-жылы ошондой эле 120 соттук экспертиза жүргүзүлүп, эмгек коргоо боюнча 236 окутуу иш-чарасы уюштурулуп, жарандардан 1306 жазуу түрүндөгү суроо-талаптар кабыл алынып, 6541 оозеки кеңеш берилген.
Ведомстводон билдиришкендей, эмгек мыйзамдарын сактоого системалуу көзөмөл жүргүзүү кызматкерлердин укуктарын коргоо, жумуш ордунда тартипти жогорулатуу жана эмгек коопсуздугун камсыздоо максатын көздөйт.
