Жарандар ысык линияга чалып, акысыз жана анонимдүү жардам ала алышат.
Кыргыз Республикасынын Эмгек, социалдык камсыздандыруу жана миграция министрлиги үй-бүлөлүк зомбулук жана адамдарды соодалоо курмандыктары болгон аялдар жана кыздарды коргоого багытталган жаңы социалдык долбоордун башталышын жарыялады. Инициатива мамлекеттик социалдык заказдын алкагында ишке ашырылууда.
Министрликтин маалыматына ылайык, 5200 номериндеги 24 сааттык ысык линия өз ишин баштап, зомбулукка жана эксплуатацияга кабылган адамдарга ыкчам жана сапаттуу колдоо көрсөтүүдө.
5200 номеринде анонимдүү, акысыз жана купуя жардам алууга болот. Кризистик кырдаалдар жана зомбулук боюнча атайын даярдыктан өткөн профессионалдык психологдор жана консультанттар зарыл болгон колдоону көрсөтүүгө даяр.
Ысык линия өлкөнүн бардык аймагында бардык мобилдик операторлор аркылуу 24/7 жеткиликтүү.
Ысык линиянын негизги функцияларына төмөнкүлөр кирет:
• зомбулукка жана эксплуатацияга кабылган адамдарга психологиялык колдоо көрсөтүү;
• жабыркагандардын укуктарын коргоо боюнча жеткиликтүү кызматтар жана чаралар жөнүндө маалымат берүү;
• медициналык жана юридикалык жардам, ошондой эле коопсуз башпаанек боюнча консультациялар;
• зомбулукка күбө болгон жакындарына жана күбөлөргө колдоо көрсөтүү.
Министрликте: "Ар бир чалуу маанилүү. Эгер сиз зомбулукка кабылган болсоңуз же мындай учурларга күбө болсоңуз, 5200 номерине кайрылуудан тартынбаңыз" деп белгилешти.
Сүрөт www
