Бишкектин 2050-жылга чейин өнүктүрүү боюнча Генералдык планына ылайык, шаар бийликтери 12 микрорайондон борборго жана Ош базарына чейин жаңы трамвай линиясын тартууну пландаштырууда. Бул маалымат борбордун мэриясында айтылды.
Шаардык башкармалыктын маалыматы боюнча, трамвай линиясы Аалы Токомбаев проспектиси боюнча 12 микрорайондон башталып, Киев көчөсү аркылуу Ош базарына чейин жетет.
«Курулуш иш-чараларын ишке ашыруунун тартиби жана маршруттарды тандоо кийинки долбоорлоо этаптарында аныкталат, анын ичинде техникалык-экономикалык негиздемени иштеп чыгуу», — деп белгиленди билдирүүдө.
Мындан тышкары, тургундар шаарды айланып өтүүчү трамвай линиясын түзүү боюнча сунуш беришти.
Мэрия бул сунушка жооп берип, Генералдык планда каралган трамвай линиялары эң көп жүргүнчү агымы бар багыттарды камтыйт, анын ичинде борбор менен байланышкан жогорку тыгыздыктагы турак жай аймактарын эске алат деп түшүндүрдү.
Ошентип, шаарды айланып өтүүчү трамвай линиясын түзүү жүргүнчү ташуу үчүн натыйжалуу болбойт, деп кошумчалашты шаардык башкармалыктан.
