Кыргыз Республикасынын Саламаттык сактоо министрлигинде вице-министр Темирбек Эркинов менен Швейцария Конфедерациясынын элчиси Сироко Мессерлинин ортосунда жолугушуу өттү.
Министрликтин маалыматына ылайык, жолугушууда Швейцариянын колдоосу менен Кыргызстандагы саламаттык сактоо тармагында ишке ашырылган долбоорлордун жетишкендиктери жана натыйжалары, ошондой эле келечектеги кызматташуу мүмкүнчүлүктөрү талкууланды.
Негизги көңүл бир катар багыттардагы биргелешкен иш-чаралардын жыйынтыктарына бурулду:
- саламаттык сактоо тармагында жарандардын финансылык коргоосун жакшыртуу;
- калктын ден соолук боюнча маалымдуулугун жогорулатуу жана жергиликтүү ден соолук комитеттеринин ассоциацияларын түзүү;
- медицина кызматкерлеринин квалификациясын жогорулатуу;
- инфекциялык эмес оорулардын алдын алуу жана башкаруу менен бирге биринчи медико-санитардык жардамды күчөтүү;
- саламаттык сактоо системасында башкарууну оптимизациялоо.
Ведомствонун маалыматы боюнча, ишке ашырылып жаткан долбоорлор медициналык кызматтардын жеткиликтүүлүгүн жана сапатын жакшыртууга, алдын алуу иш-чараларын өнүктүрүүгө жана саламаттык сактоо системасынын институттук потенциалын күчөтүүгө жардам берет.
Келечектеги кызматташууну талкуулап, тараптар өнөктөштүктү улантууга жана саламаттык сактоону өнүктүрүүнүн негизги багыттарында биргелешкен ишти кеңейтүүгө кызыктар экендиктерин билдиришти.
