Turmush — Ат-Башыда медициналык кадрлардын олуттуу жетишсиздиги сакталууда.
Райондун жалпы дарыгерлик практика борборунун жетекчиси Азим Ажыбеков, Turmushтун кабарчысына медициналык адистерди бул тармакка тартуу боюнча учурдагы аракеттер тууралуу айтып берди.
Ажыбековдун белгилөөсү боюнча, акыркы жылдары жаш адистер үчүн шарттарды жакшыртуу боюнча кадамдар жасалууда. Мурда оорукананын 15 орундуу жатаканасы болгон, бирок өткөн жылы 2 млн 800 миң сомдук каржылоону алуу үчүн долбоор иштелип чыккан. Натыйжада жатакана кеңейтилип, дагы 6 орун кошулду жана объект азыркы учурда керектүү стандарттарга толугу менен жооп берет.
Мындан тышкары, айыл өкмөтү жаңы адистер үчүн социалдык пакет түзүү мүмкүнчүлүгүн карап жатат. Бул маселе азыр талкууланууда, эгер депутаттар аны колдосо, кадрларды тартуу процессин кыйла жеңилдетиши мүмкүн.
Ошондой эле, бийликтин буйругуна ылайык, апрель айынан медиктер үчүн айлык акынын эки эсе жогорулашы күтүлүүдө. Бул боюнча февраль айында Кыргыз мамлекеттик медициналык академиясында жумуш орундарынын жарманкеси өткөрүлөт. Керектүү адистерди тартуу үчүн атайын буклеттер иштелип чыгууда.
Учурда Ат-Баши районунда атайын төмөнкү адистерге муктаждык бар:
- неонатолог
- акушер-гинеколог
- кардиолог
- инфекционист
- педиатр
- үй дарыгери
- фтизиатр
- онколог
- ЛОР-дарыгери
- офтальмолог
«Алдын ала сүйлөшүүлөр жүрүп жатат. Биз күзүндө офтальмолог жана эндокринолог бизге кошулат деп күтүп жатабыз», — деди ал.
Бүгүнкү күндө райондо 7 жаш дарыгер жана 3 ординатор-интерн иштеп жатат. Бирок медициналык кадрларга болгон муктаждык азырынча жогору бойдон калууда», - деп жыйынтыктады Ажыбеков.
