2026-жылдын 12-февралында Кыргыз Республикасынын Саламаттык сактоо министрлигинде өткөн жыйында, санариптик өнүктүрүү боюнча орун басар министр Темирбек Эркинов ЮНИСЕФтин өлкөдөгү өкүлү Самман Джунг Тапа менен жолугушту.
Жолугушууда вакцина жеткирүүнүн туруктуулугун камсыз кылуу, сатып алуу процессин жакшыртуу жана иммунизация программасын өркүндөтүү сыяктуу саламаттык сактоо тармагындагы актуалдуу маселелер жана кызматташтык келечеги талкууланды.
ЮНИСЕФтин өкүлдөрү атайын жабдуулар менен 80% камсыздоо боюнча жетишкендиктерди, ошондой эле вакциналарды медициналык мекемелерге коопсуз жеткирүү үчүн рефрижератордук унаалар жана пикапдар жеткирүү боюнча маанилүү жардам тууралуу маалымат беришти.
ЮНИСЕФ аркылуу жеткирилген вакциналардын сапаты жана коопсуздугуна, сатып алуу жана логистика процесстерин санариптештирүүгө, заманбап маалыматтык технологияларды киргизүүгө өзгөчө көңүл бурулду, бул жеткирүү мониторинг системасын бекемдөөгө жана ачыктыкты жогорулатууга мүмкүндүк берет. Мындан тышкары, ЮНИСЕФ 1,267,000 АКШ долларын түзгөн Улуттук вакцина сактоочу жайдын курулушун колдоо пландары тууралуу маалымдады.
Тараптар ошондой эле иммунизация системасын бекемдөө, саламаттык сактоонун туруктуулугун жогорулатуу жана калктын профилактикалык кызматтарга жеткиликтүүлүгүн кеңейтүүгө багытталган иштеп жаткан программалар жана долбоорлордун алкагында биргелешкен аракеттерди координациялоону талкуулашты.
Талкуунун жүрүшүндө 2026-2027-жылдарга биргелешкен иш-аракеттер планынын даярдалышы, ошондой эле вакциналарды сатып алуу боюнча башкаруу тармагында техникалык жана эксперттик колдоону кеңейтүү жана тажрыйба алмашуу боюнча өнөктөштүктү өнүктүрүүгө кызыкдар экендиги белгиленди.
