Депутат Нурбек Сыдыгалиев бул мыйзам долбоорунун демилгесин көтөрдү.
Анын айтымында, негизги идея мыйзам долбоорлорун экинчи жана үчүнчү окууларда дароо же үч окууда бир эле учурда карап чыгууга мүмкүндүк берүүчү процессти тактоо болуп саналат.
Учурдагы регламент боюнча мыйзам долбоорун ылдамдатылган кабыл алуу үчүн депутаттык топтордун жана фракциялардын көпчүлүгүнүн оң жообу, ошондой эле жооптуу жана профилдик комитеттердин макулдугу талап кылынат.
«Киргизилген өзгөртүүлөргө ылайык, ылдамдатылган карап чыгуу үчүн бардык фракциялардын жана депутаттык топтордун макулдугу алынуусу керек. Эгерде бир фракция каршы чыкса, мыйзам долбоору экинчи жана үчүнчү окууларда дароо кабыл алынбайт, ал адаттагы карап чыгуу тартибине ылайык каралат», — деп жазылган мыйзам долбоорунун маалымкатында.
Нурбек Сыдыгалиев учурдагы норманын айрым фракциялардын мыйзам долбоорлорун талкуулоодо өз саясий позицияларын билдирүү мүмкүнчүлүктөрүн чектеп жатканын белгиледи. Ошондуктан, мыйзам чыгаруу процессине толук катышуусун камсыз кылуу үчүн бардык парламенттик бирикмелердин макулдугун алуу талабын киргизүү сунушталууда.
