Кыргыз Республикасынын Юстиция министрлигинин биринчи орун басары Алмазбек Зарылбек уулу Граждандык кодекске электрондук акчалар мүлктүн бир бөлүгү катары эсептелет деген жобо кошулары тууралуу түшүндүрдү.
Ошентип, санариптик капчыктардагы каражаттар традициялык банктык эсептер сыяктуу мурас катары өткөрүлө алат.
«Платеждик система жөнүндө» мыйзамдагы өзгөртүүлөр так процедураны киргизүүнү сунуштайт: электрондук каражаттардын ээси каза болгондон кийин эмитент чыгым операцияларын бөгөттөп, нотариус же мурас алгандар тарабынан берилген суроолорго каражаттардын бардыгы тууралуу маалымат берүүгө милдеттүү болот, ошондой эле алардын укуктарын тастыктаган соң, бул каражаттарды мурас алгандарга өткөрүүгө милдеттүү.
Мындан тышкары, өзгөртүүлөр «Банктар жана банктын иши жөнүндө» мыйзамга да тиешелүү болот: банктар нотариустарга каза болгондордун депозиттери, электрондук акчалары, сейфтик ячейкалары, металлдык эсептери жана башка активдери тууралуу маалымат берүүгө милдеттүү болот», — деп кошумчалады ал.
Вице-министр ошондой эле өлкөдө 6,6 миллионго жакын электрондук капчык катталганын жана мурас алуу үчүн белгиленген эрежелердин жоктугу талаш-тартыштарга жана түшүнбөстүктөргө алып келерин белгиледи. Жаңы мыйзам долбоору бул юридикалык боштуктарды жоюп, жарандардын мүлктүк укуктарын коргоо үчүн багытталган.
Депутаттар «электрондук акча» түшүнүгүн тактоонун зарылдыгын билдиришти, анткени жарандардын эсептеринде ар кандай өлкөлөрдүн валюталары болушу мүмкүн.
Депутат Медер Чотонов мурас алгандар каза болгондон кийин туугандарынын банктарда каражаты бар-жогун кантип билишерин сурады. Жооп катары вице-министр, мыйзам долбоору нотариустарга каза болгондордун депозиттери тууралуу маалымат алуу үчүн банктарга суроолорду жөнөтүүгө мүмкүндүк берерин, банктар бул маалыматтарды берүүгө милдеттүү болорун билдирди.
Чотонов ошондой эле электрондук акчалардын ээси мурас алгандары жок болсо, каражаттар белгилүү бир мөөнөттөн кийин, мисалы, 5–10 жылдан кийин мамлекетке өткөрүлүшү мүмкүн деген мүмкүнчүлүктү карап чыгууну сунуштады.
Вице-министр учурдагы юридикалык нормалар боюнча электрондук акчалар банктарда белгисиз мөөнөткө чейин жайгашканын тастыктады, бирок депутаттын сунушун карап чыгууну макул болду.
