Чүй облусунун тургуну аялын сабагандыгы үчүн кармалды

Чүй облусунда үй-бүлөлүк зомбулук боюнча окуя болуп, шектүү кармалганы тууралуу аймактагы укук коргоо органдары билдиришти.

Маалыматка ылайык, 2026-жылдын 7-январында 1995-жылы туулган аял Ысык-Ата районунун Ички иштер бөлүмүнө күйөөсү, 1993-жылы туулган А.Э. боюнча чара көрүүнү суранып кайрылган. Ал ошол күнү саат 12:00 чамасында, Ивановка айылындагы үйүндө, конфликт учурунда күйөөсү ага дене жаракаттарын бергенин айтып берген.

Бул окуя расмий катталган жана кийин соттук-медициналык экспертиза дайындалган. Анын жыйынтыгы боюнча аялда төмөнкү жаракаттар аныкталган: оң жакта төртүнчү кабыргасынын жабык сыныгы, ошондой эле көптөгөн көгала жана сызаттар.

Жыйналган материалдардын негизинде Кыргыз Республикасынын Кылмыш кодексинин 177-беренеси (үй-бүлөлүк зомбулук) боюнча кылмыш иши козголгон.

Шектүү 96-беренеге ылайык кармалып, убактылуу кармоо жайына жайгаштырылган.

Тергөө уланууда.

Чүй облусунун ГУВДсы аялдар жана балдарга карата агрессия жана зомбулук аракеттери катуу токтотулаарын, ал эми күнөөлүүлөр өлкөнүн мыйзамдарына ылайык жоопкерчиликке тартыларын баса белгилейт.