Министрликтин басма сөз кызматы билдиргендей, «Билим стандарт» аккредитациялык агенттигин убактылуу токтотуу чечими мурда аныкталган олуттуу бузуулар жоюлбагандыгы жана кеңештин бир нече чечимдери аткарылбагандыгы менен байланыштуу кабыл алынды. Натыйжада, агенттиктин таанылышы алты айга токтотулду.
Жыйында министрликтин реестрине кирген алты аккредитациялык агенттиктин 2025-жылдагы иши боюнча отчеттор каралды. Бул отчеттордун негизинде даярдалган сунуштар талкууланды.
2025-жылга Улуттук аккредитациялык кеңештин ишин талдоо жыйынтыгы боюнча аккредитациялык агенттиктер жана билим берүү мекемелери тарабынан аккредитация процедураларын катуу сактоонун мааниси, ошондой эле кызыкчылыктар кагылышын алдын алуу жана мыйзамсыз аракеттерге каршы туруштун зарылдыгы белгиленди.
Мындан тышкары, учурдагы нормативдик укуктук актыларга өзгөртүүлөрдү киргизүү менен аккредитациялык ишмердүүлүктү жакшыртуу пландары тууралуу маалымат берилди.
