2025-жылдын 26-декабрында 1989-жылы туулган И.Э. аттуу жергиликтүү тургун Москва районунун ИИБсына топтук арыз менен кайрылган. Ал 2024-жылдан бери Г.А. аттуу жаран 25-30 адамды кичи ГЭСтин курулушунда бетон иштерин аткарууга тартканын билдирген. Бирок өткөн жылдын декабрь айында 50-60 миң сомдук айлык төлөнгөн эмес.
Чүй облусунун ГУВДсынын сүрөтү
Бул жагдайга байланыштуу Кыргыз Республикасынын Кылмыш кодексинин 209-беренеси "Алдамчылык" боюнча кылмыш иши козголду.
Тергөө Г.А. 1993-жылы туулган, ГЭС-1 жана ГЭС-2 объектилеринде субподрядчы катары иш алып барып, "А.Г.Э." компаниясы менен оозеки келишим боюнча иштерди аткарганын аныктады. Бетон иштеринин бир куб метринин наркы 5 миң 500 сомду түзгөн. Г.А. өз ишин жүргүзүү үчүн жубайынын атына жеке ишкер катары катталган.
Чакырылган жергиликтүү тургундардын саны 100гө жакын болуп, аларга саатына 200 сом төлөнүшү керек болчу. Бирок 2025-жылдын ноябрынан 8-декабрына чейин 25 жумушчуга айлык берилген эмес.
Тергөө белгилегендей, аталган мезгилде 7 миң 200 куб метр бетон иштери жана башка курулуш тапшырмалары аткарылган. "А.Г.Э." компаниясынан Г.А. алган жалпы сумма 43 миллион 446 миң 878 сомду түзгөн, анын ичинен 3 миллион 115 миң сом салык катары төлөнгөн.
Г.А. Кыргыз Республикасынын Кылмыш-процессуалдык кодексинин 96-беренесине ылайык кармалып, убактылуу кармоо жайына жайгаштырылды.
Тергөө уланууда.
