Чүй облусунда кичи ГЭСтин курулушунда жумушчуларына маяна төлөбөгөн шектүү субподрядчы кармалды.
Чүй облусунун Ички иштер башкармалыгы берген маалыматка ылайык, 2025-жылдын 26-декабрында Московский районунун ОВДсына 1989-жылы туулган жергиликтүү тургун И.Э. топтук арыз менен кайрылган. Ал 2024-жылдан баштап Г.А. аттуу жаран 25-30 адамдан турган топту Ак-Суу капчыгайындагы кичи ГЭСтин курулушунда бетон жумуштарын аткарууга тартканын билдирген. Айлык маяна 50 000-60 000 сомдун аралыгында белгиленгенине карабастан, 2025-жылдын декабрь айындагы эмгек акы төлөнгөн эмес.
Окуя боюнча Кыргыз Республикасының Кылмыш-жаза кодексинин 209-беренеси (Алдамчылык) боюнча кылмыш иши козголду.
Тергөө учурунда Г.А. 1993-жылы туулган, 2024-жылдын октябрь айында «А.Г.Э.» компаниясына караштуу ГЭС-1 жана ГЭС-2 объектилеринде субподрядчы катары оозеки келишим менен бетон жумуштарын аткарууга киришкени аныкталды. Бир кубометр бетонду куюунун баасы 5 500 сомду түзгөн. Бизнести жүргүзүү үчүн Г.А.нын жубайы Э.К.нын атына жеке ишкер катары катталган, ишеним кат менен.
Жумуш учурунда болжол менен 100 жергиликтүү тургун тартылган, аларга саатына 200 сом төлөнгөн. Бирок 2025-жылдын ноябрь айынан 8-декабрга чейин 25 жумушчунун маянасы төлөнгөн эмес.
Тергөө учурунда белгиленген мезгилде 7 200 кубометр бетон жумуштары аткарылганы жана башка курулуш иштеринин жүргүзүлгөнү аныкталды. Г.А. «А.Г.Э.» компаниясынан алган жалпы сумма 43 446 878 сомду түзгөн, анын ичинен 3 115 000 сом салык катары төлөнгөн.
Кыргыз Республикасынын Кылмыш-процессуалдык кодексинин 96-беренесине ылайык, Г.А. кармалып, убактылуу кармоо жайына жайгаштырылды.
Тергөө уланууда.
