Анын айтымында, мындай чаралар күйүүчү-майлоочу материалдардын Нарын дарыясына төгүлүшү жана зыян келтириши менен байланыштуу кабыл алынган. Адистер окуя болгон жерге чыгышты.
«Ошентип, 14-январда, Бишкек—Ош авто жолунун 428-км жеринде К. А. аттуу айдоочу «DAF» маркасындагы өзүнө таандык унааны башкарууда жол кырсыгына кабылды. Ал «Жалал-Абад КПК» [Манас шаарындагы «Кыргыз Петролеум Компани» ЖАК] заводунан Кара-Балта шаарындагы жылуулук энергетикасы ишканасына 36 410 литр мазут ташып бара жаткан. Авариянын натыйжасында мазут жолдун четине жана Нарын дарыясына төгүлдү. Суу үлгүлөрү алынды, ошондой эле жер бетине 49 м² жалпы аянтта зыян келтирилгени аныкталды.
Зыяндын жалпы суммасы 9 миң 525,6 сомду түздү. Мындан тышкары, укук бузуулар кодексинин 237-беренесине («Агро жерлерди жана башка жерлерди бузуу») ылайык 20 миң сом өлчөмүндө айып пул салынды, ал эми 236-беренесине («Суу ресурстарын булгануудан жана ластануунан коргоо талаптарын бузуу») ылайык 10 миң сом өлчөмүндө айып пул салынды», - деди Залимбеков.
«Кыргыз Петролеум Компани» ЖАК Кыргызстанда мунай продуктыларын өндүрөт, компаниянын 100% акциясы «Кыргызнефтегаз» ААКна таандык. Компания мунайдан жана башка сырьё түрлөрүнөн мунай продуктыларын өндүрүү менен алектенет жана кайра иштетүү кызматтарын көрсөтөт. Учурда ишкана 3 түрдөгү продукцияны өндүрөт: бензин, дизель отуну, мазут.
Адистер Бишкек—Ош авто жолундагы авариянын себеби жүк ташуучу унаанын рулдук рейкасынын бузулушу болуп, натыйжада айдоочу башкарууну жоготконун билдиришти. Окуянын натыйжасында эч ким жабыркаган жок.
Мурда Turmush күбөлөргө таянып, бул жол кырсыгы тууралуу маалымдаган. Бул участогундагы жол кыймылы болжол менен бир саатка чектелгендиги белгиленген.
