Бишкек милициясы чет элдиктерден жеке башын тастыктаган документтерди алып жүрүүнү суранып жатат

7-январда Бишкек ШИИБинин маалымат кызматы бардык чет элдик жарандар өздөрүнүн жеке инсандыгын тастыктаган документтердин оригиналдарын болушу керектигин билдирди.

Экстремизмге жана мыйзамсыз миграцияга каршы күрөшүү кызматынын оперативдик кызматкерлери тарабынан өткөрүлүп жаткан «Нелегал» рейдинин алкагында чет элдиктер менен мыйзамдарга ылайык жүрүү зарылдыгы жөнүндө эскертүү жүргүзүлүүдө.

Профилактикалык иш-чаралардын жүрүшүндө укук коргоо органдары чет элдиктерден паспорт же башка инсандыгын тастыктаган документтерди, ошондой эле жумушчу же окуу визасын жана миграциялык каттоодон өткөндүгү тууралуу күбөлүктү өздөрү менен алып жүрүүнү өтүнүшөт.

Мындан тышкары, милиция чет элдиктердин документтери чакырган тарап тарабынан, жумуш берүүчү же окуу жай болобу, алынбашы керектигин эскертет.