Бүгүн, 24-февралда, Жогорку Кенештин Эмгек, саламаттык сактоо, аялдар жана социалдык маселелер боюнча комитетинин жыйынында Кыргыз Республикасынын Саламаттык сактоо министрлигинен гепатиттерге байланыштуу алдын алуу жана учурдагы эпидемиологиялык кырдаал боюнча маалымат сунушталды.
Саламаттык сактоо министринин орун басары Бакытбек Кадыралиев 2025-жылы Кыргызстанда 8555 оору учурлары катталганын, ал эми 2024-жылы бул сан 21195ке жеткенин билдирди. Ал жалпы ооруу деңгээли 2,4 эсе төмөндөгөнүн баса белгиледи. Мындан тышкары, 2026-жылдын 1-январына карата 578 жаранга боор трансплантациясы жасалган.
Жыйындын жүрүшүндө депутат Жылдыз Эгенбердиева В жана С вирусу гепатиттерине скрининг программасын тездетүү жана тиешелүү реестр түзүү зарылдыгына көңүл бурду. Ал лабораториялык изилдөөлөр жүргүзүлгөндөн кийин гана вакцинация жүргүзүүнү сунуштады.
Депутат Нуржамал Торобекова калктын таза ичүүчү сууга жеткиликтүүлүгү боюнча маселе көтөрдү, суу жетишсиздиги инфекциялык оорулардын көбөйүшүнүн негизги себептеринин бири экенин белгиледи.
Комитеттин төрайымы Гулсункан Жунушалиева профилактикалык чараларды күчөтүү жана медициналык мекемелерди зарыл дары-дармектер, реагенттер, тесттер жана вакциналар менен камсыздоо зарылдыгын билдирди. Республикалык гемоконтакттык вирус гепатиттери жана ВИЧ контролдоо борборунун директору Умуткан Чокморова 2026-жылга карата бул максаттар үчүн 492 миллион сом бөлүнгөнүн кошумчалады.
Депутат Гулнара Баатырова Саламаттык сактоо министрлигине караштуу Улуттук коомдук саламаттык институтунун илимий-аналитикалык потенциалын жогорулатуу маанилүүлүгүн белгилеп, калкты вакцинациядан баш тартуу учурлары тууралуу маалымдуулугун жакшыртууга чакырды. Ошондой эле Улукбек Карыбек уулу гепатиттен жабыркаган жарандар үчүн социалдык коргоо механизмдерин күчөтүүнүн зарылдыгын баса белгиледи.
Болотбек Борбиев Таш-Кумырдын тургундарынын шаардагы вирус гепатитинин жайылышына байланыштуу арыздарын маалымдады. Ал таза ичүүчү сууга жеткиликтүүлүктүн жетишсиздиги бул маселени жараткан негизги себептердин бири экенин айтты жана мамлекеттик органдарды бул маселени чечүү үчүн чара көрүүгө чакырды.
Жыйынын жыйынтыгы боюнча комитеттин мүчөлөрү маалыматты эске алышты.
