Кечээ «Манас Менеджмент» ЖЧКнын борттук тамактануу борбору «Аэромар» компаниясынын өкүлдөрү менен жолугушуу өткөрдү. «Аэромар» – ТМД жана Чыгыш Европа өлкөлөрүндө борттук тамактануу боюнча алдыңкы операторлордун бири.
Жолугушуунун жүрүшүндө тараптар борттук тамактанууну өндүрүү жана жеткирүү, тажрыйба алмашуу, заманбап сапат жана коопсуздук стандарттарын киргизүү, ошондой эле ишканалардагы технологияларды өнүктүрүү боюнча стратегиялык өнөктөштүктүн мүмкүнчүлүктөрүн изилдешти. Негизги көңүл өндүрүш процессин оптималдаштыруу, эл аралык авиакомпаниялардын талаптарына ылайык тамак-аш ассортиментин кеңейтүү жана жүргүнчүлөр үчүн кызматты жакшыртууга бурулду.
«Аэромар» акционердик коому көп жылдан бери өз тармагында лидерлик позицияларды ээлеп, орус жана чет өлкөлүк авиакомпанияларды борттук тамак менен камсыздап келет. Компания жогорку технологиялык өндүрүш кубаттарына ээ, автоматташтырылган сапат контролдоо системаларын киргизет жана эл аралык HACCP стандарттарын, ошондой эле авиациялык коопсуздук талаптарын катуу сактайт. «Аэромар» өзүнүн кулинардык концепцияларын активдүү өнүктүрүп, шеф-ашпозчулар менен кызматташып, дүйнөлүк гастрономиялык тренддерди эске алып менюну жаңыртып турат.
Жолугушуунун алкагында технологиялык чечимдерди, өндүрүш жана башкаруу боюнча мыкты практикаларды алмашуу мүмкүнчүлүктөрү, ошондой эле кызматкерлердин квалификациясын жогорулатуу маселелери да талкууланды.
«Биз жетишилген келишимдердин ишке ашырылышы борттук тамактануу борборунун өндүрүш мүмкүнчүлүктөрүн жогорулатууга, сунушталган кызматтардын спектрин кеңейтүүгө жана авиациялык кызмат көрсөтүү рыногунда регионалдык жана эл аралык деңгээлде позицияларыбызды бекемдөөгө мүмкүндүк берет деп күтүп жатабыз», - деди «Кыргызстандын аэропорттору» акционердик коомунун коммерциялык директору Аман Мамаев.
«Күчтүү эл аралык өнөктөштөр менен кызматташуу биз үчүн өтө маанилүү. Бул борттук тамактануу борборунун ишинде мыкты стандарттарды киргизүүгө жана алдыңкы тажрыйбаларды алууга мүмкүндүк берет, бул болсо биздин кызматтарыбыздын атаандаштыкка жөндөмдүүлүгүн жогорулатат», - деп белгиледи «Манас Менеджмент» ЖЧКнын директору Абсамат Тельтаев.
Жолугушуунун жыйынтыгында тараптар профессионалдык кызматташтыкты өнүктүрүү жана өндүрүш кубаттарын модернизациялоого, авиациялык кызматтын сапатын жакшыртууга багытталган биргелешкен демилгелерди ишке ашырууга кызыктар экендиктерин билдиришти.
```
