23-февралда, Жогорку Кенештин спикери Марлен Маматалиевдин өткөргөн жыйынында парламент аппаратынын иши боюнча маанилүү маселелер талкууланды. Бул тууралуу маалымат парламенттин басма сөз кызматы тарабынан берилди.
Жыйынынын башында Марлен Маматалиев жаңы аппарат жетекчиси - Алмасбек Абытовду жамаатка тааныштырды, анын Жогорку Кенеште 18 жылдык тажрыйбасы бар экенин белгиледи.
«Алмасбек Абытов көп жылдар бою парламентте президенттин өкүлү болуп кызмат өтөдү, ошондой эле министрлик кызматты аткарды. Мен анын тажрыйбасы парламенттин ишин илгерилетүүгө жана учурдагы реформаларды аяктоого жардам берет деп ишенем. Келечектеги 1-2 айдын ичинде пландалган реформаларды аткарып, аппараттын ишин жакшыртуу маанилүү, парламенттин натыйжалуулугун жогорулатуу үчүн», – деди Маматалиев.
Спикер ошондой эле Абытов жетектеген аппаратка бир катар приоритеттүү тапшырмаларды белгиледи. «Кызматкерлер саясий интригалардан алыс болуп, кызматтык милдеттерин жоопкерчилик менен аткарышы керек. Маселелерди аткарууда бардык депутаттарга бирдей мамиле кылуу маанилүү. Биз мыйзам чыгаруу ишин жана санариптештирүүнү өнүктүрүүгө көңүл бурабыз. Бул үчүн кызматкерлердин профессионалдуулук талаптарын жогорулатабыз жана алардын потенциалын өнүктүрүү боюнча иштерди күчөтөбүз», – деп кошумчалады ал.
Мындан тышкары, торага аппараттын кадрдык курамындагы өзгөртүүлөр иштин сапатын жогорулатууга багытталгандыгын белгиледи. «Биз профессионал кызматкерлерди колдойбуз жана зарылчылыкка жараша аларды башка мамлекеттик органдардагы жетекчилик кызматтарга сунуштайбыз. Биздин милдет – кадрларды жөн гана алмаштыруу эмес, кызматкерлерди мотивациялоо жана алардын тажрыйбасын натыйжалуу пайдалануубуз керек», - деп баса белгиледи Марлен Маматалиев.
Алмасбек Абытов, өз кезегинде, спикерге ишеним көрсөткөндүгү үчүн ыраазычылык билдирди жана берилген тапшырмаларды ийгиликтүү аткаруу жана парламенттин өнүгүү стратегиялык планын ишке ашыруу үчүн бардык күч-аракетин жумшарын убада кылды. ```
