Эмгекчилердин айтымында, жумушка кабыл алынганда эмгек келишимдери кол коюлган эмес, бирок жумуш убактысын эсепке алуу журналы жүргүзүлгөн, ошондой эле алардын эмгек ишмердүүлүгүн тастыктаган фото жана видео материалдары сакталган. Алар Акыйкатчыга укуктарын коргоо жана жумуш орундарында калыбына келтирүү боюнча жардам сурап кайрылышкан.
Институт социалдык саясат министрлигинин эмгек мыйзамдарын сактоону көзөмөлдөө жана текшерүү кызматына, ошондой эле «ГИК» акционердик коомуна жана Талас облусундагы Президенттин ыйгарымдуу өкүлчүлүгүнө расмий суроо жөнөттү.
ГИКтен келген жоопто алар курулуштун заказчысы гана болуп саналат, ал эми фактикалык иштерди мамлекеттик «Кыргызстройсервис» ишканасы жүргүзүп жатканы көрсөтүлгөн.
Текшерүү учурунда учурдагы компания долбоорго киришкенге чейин көп кабаттуу үйдүн курулушу башка уюмга өткөрүлгөндүгү жана ал иштерди аяктабастан долбоордон чыгып кеткендиги аныкталды.
Институттун кийлигишүүсүнөн кийин жаңы подрядчик жергиликтүү тургундарды жумушка алууга макул болду, эгерде аларда зарыл болгон квалификация жана тажрыйба болсо. Февральдын башында жумушчулар өздөрүнүн кызматтарына калыбына келтирилгенин билдиришип, Акыйкатчыга көрсөтүлгөн жардам үчүн ыраазычылык билдиришти.
