Талас облусунда 21 жумушчу Кыргыз Республикасынын акыйкатчысы Жамилий Жаманбаевге эмгек укуктарын коргоо боюнча кайрылышты, деп билдирет Акыйкатчы институтунун басма сөз кызматы.
Жумушчулар 5-январдан 16-январга чейин Мамлекеттик ипотекалык компания тарабынан каржыланган көп кабаттуу үйдүн курулушунда иштегенин билдиришти. Бирок 16-январда алар күтүүсүздөн жумуштан четтетилип, алардын ордуна коңшу өлкөдөн 60дай жумушчу тартылган.
Кайрылгандардын айтымында, алар менен эмгек келишимдери түзүлгөн эмес, бирок жумуш убактысын эсепке алуу журналы жүргүзүлгөн, ошондой эле алардын эмгек ишмердүүлүгүн тастыктаган фото- жана видеотасмалар бар. Алар укуктарын коргоо жана кайра жумушка орношуу үчүн акыйкатчыга жардам сурап кайрылышты.
Акыйкатчы институту Эмгек, социалдык камсыздандыруу жана миграция министрлигинин эмгек мыйзамдарын көзөмөлдөө жана байкоо кызматына, "Мамлекеттик ипотекалык компания" акционердик коомуна, ошондой эле облустук прокуратурага жана Талас шаарындагы президенттин ыйгарым укуктуу өкүлчүлүгүнө суроолор жиберди.
Мамлекеттик ипотекалык компаниядан келген жоопто, ал курулуштун заказчысы экендиги жана курулуш иштерин мамлекеттик "Кыргызстройсервис" ишканасы жүргүзүп жатканы белгиленген. Мындан тышкары, долбоор мурда башка компания тарабынан жүргүзүлгөн, ал компания долбоордон чыгып кеткенден кийин милдеттенмелер жаңы подрядчыга өткөрүлгөнү аныкталган.
Институттун кайрылуусунан кийин жаңы подрядчы жергиликтүү тургундарды, керектүү квалификация жана тажрыйбага ээ болгон адамдарды жумушка орноштуруу үчүн даяр экендигин билдирди.
Февраль айынын башында кайрылгандар кайра жумушка орношкондугун билдиришти жана акыйкатчыга жардам үчүн ыраазычылык билдиришти.
