Ала-Тоо Live программасынын түз эфиринде, Кыргызстандын суу ресурстары, айыл чарба жана кайра иштетүү өнөр жайы боюнча биринчи орун басары Жаныбек Керималиев «Агродиалог-2026» агроөнөр жай форуму тууралуу айтып берди. Ал жайыттардын деградациясын азайтуу үчүн малдын санын көбөйтүү эмес, анын сапатын жакшыртуу маанилүү экенин белгиледи.
Анын айтымында, жайыттардын деградациясы өлкө үчүн олуттуу чакырык бойдон калууда. Адистердин баамында, жогорку өндүрүмдүү асыл тукум малдын үлүшүн көбөйтүү жайыттарга болгон жүктөмдү 5% га азайтууга мүмкүндүк берет. Бул, азыраак, бирок өндүрүмдүүлүгү жогору малды, анын ичинде эт жана сүт багытында кармоо экономикалык жана экологиялык жактан да натыйжалуу экенин билдирет.
Бул аракеттердин алкагында республикага Aberdeen Angus, Simmental жана швед тукуму сыяктуу жогорку сапаттагы асыл тукум малдын уруктары киргизилген. Уруктук материал фермерлерге ветеринардык жана техникалык адистер аркылуу бөлүштүрүлүп, асыл тукум мал чарбасын өнүктүрүү программасынын алкагында консультациялык колдоо көрсөтүлөт.
Күз мезгилин аяктаган соң жаңы тукумдардын өсүшү жана өндүрүмдүүлүгү боюнча анализ жүргүзүү пландалууда, бул долбоордун натыйжалуулугун баалоого мүмкүндүк берет.
Министрликте асыл тукум мал чарбасын өнүктүрүү стратегиялык кадам экенин, бул жайыттарды сактоого жана айыл чарбадагы экономикалык натыйжалуулугун жогорулатууга жардам берерин баса белгилешет.
