Кыргызстандын саламаттык сактоо министринин биринчи орун басары Айбек Маткеримовдун Индирия Молдогазиев менен Германиянын өнүктүрүү банкы (KfW) жана Керез Келишова менен GITEC-IGIP консалтинг компаниясынан өткөргөн жолугушуусунда SAMEDIS медициналык жабдыктарын санариптик инвентаризациялоо системасын ишке ашыруу маселелери талкууланды. Бул тууралуу Саламаттык сактоо министрлигинин маалымат борбору маалымдады.
Талкуу учурунда Германия тарабынан каржыланган «Саламаттык сактоо V» сектордук программасын ишке ашыруунун этаптары каралды. Жолугушуунун катышуучулары техникалык колдоо, маалыматтарды актуалдаштыруу жана саламаттык сактоо мекемелеринде системанын туруктуу иштешин камсыз кылууга көңүл бурушту.
Бул иш-чаранын алкагында медициналык мекемелердин иш процессин колдоо жана жабдыктарды санариптик эсепке алууга көмөктөшүү үчүн 150 принтер жана 1000 картридж тапшырылды.
Бүгүнкү күндө бардык пландалган медициналык мекемелерде кызматкерлер үчүн окутуу тренингдери өткөрүлдү жана система ийгиликтүү ишке киргизилди. Медициналык жабдыктарды инвентаризациялоо региондордо улантылууда, Бишкек жана Чүй облусу негизги этапты аяктап, маалыматтарды туруктуу актуалдаштырууга өтүштү.
Мындан тышкары, маалымат базасы менен иш алып барган жана киргизилген маалыматтын сапатын көзөмөлдөгөн кызматкерлер окутулду. Келечекте медициналык жабдыктарды эсепке алуу «Кыргызфармация» мамлекеттик ишканасы тарабынан жүргүзүлөт.
«Кыргыз Республикасынын саламаттык сактоо министрлиги Германиянын өнүктүрүү банкы (KfW) жана GITEC-IGIP консалтинг компаниясы тарабынан көрсөтүлгөн колдоону жогору баалайт. Биздин кызматташтыгыбыз улуттук саламаттык сактоо системасынын туруктуулугун жана натыйжалуулугун жогорулатууга жардам берет», — деп белгиледи Айбек Маткеримов.
Кийинки кадам техникалык колдоону уюштуруу жана санариптик чечимдерди мындан ары өнүктүрүү болот.
